Тропарь, глас 2

Кондак, глас тойже

Смиренномудрия исповедниче предивный / и человеколюбия Духом Святым согреваемая доброто, / Богу возлюбленне Силуане, / о подвизе твоем Церковь Российская радуется, / иноцы же Горы Афонския и вси христианстии людие, / веселящеся, сыновнею любовию к Богу устремляются. / Егоже моли о нас, равноангельне боговедче, / во еже спастися нам, в горении любве тебе подражающим.

(Служба и акафист преподобному и богоносному
отцу нашему Силуану, подвижнику и старцу
Русского Пантелеимонова монастыря
на Святой Горе Афон. -М.: Московское подворье
Свято-Пантелеимонова монастыря, 1993).

+ + +

Тропарь, глас 4:

Христа Учителя / в пути смирения помолився приял еси, / свидетельствующу Духу в сердце твоем спасение, / сего ради веселятся ныне людие вси / о памяти твоей, на упование званнии; / преподобне отче Силуане, / моли Христа Бога спастися душам нашим.

В обителех же поют:

Христа Учителя / в пути смирения помолився приял еси, / свидетельствующу Духу в сердце твоем спасение, / сего ради постничества показался еси вождь, / яко света Божественна исполнь; / преподобне отче Силуане, / моли Христа Бога спастися душам нашим.

Изрядно же в обители Святаго глаголем:

Христа Учителя / в пути смирения помолився приял еси, / свидетельствующу Духу в сердце твоем спасение, / сего ради постничества показался еси вождь, / яко света Божественна исполнь; / преподобне отче Силуане, / свыше благодать твою присно ниспосылай стаду твоему.

Ин тропарь Преподобнаго, глас 3:

Проповедник любве Христовой / дался еси вселенней, / ты сладчайший в богословех, / преподобне отче, / Смиреннаго бо и Кроткаго узрел еси / и сердце Онаго познал еси; / темже мы вси, Силуане преблаженне, / твоими богоглаголивыми словесы просвещаеми, / славим прославльшаго тя Духа.

Ин тропарь, глас 8:

Афону яко светило возсиявша / и вселенную аки солнце просветивша, / Силуана ныне достойно восхвалим, / и раку мощей его облобызающе верою, / к нему от сердца умиленнаго возопиим: / Радуйся, отче всемирный.

Егда на земли Христу послужил еси, / непорочне в стопах Того ходящи, / ныне на небесех зриши Егоже возжелел еси, / и спребываеши Ему, якоже обеща; / темже, отче Силуане преподобне, / научи ны еюже шел еси стезею.

Ин кондак, глас 1:

Страстьми обуреваемую душу мою, / всеблаженне Силуане, / прилежно очисти молитвами твоими / да зову ти с веселием, яко славу стяжавшему у Бога. / Слава прославльшему тя Христу, / слава удивившему тя, / слава ти кротко явльшемуся / и радости безконечныя исполнившему.

Архимандрит Софроний Сахаров.
Старец Силуан. -Эссекс: Монастырь
св.Иоанна Предтечи, 1990. -С. 219-220.

+ + +

Тропарь, глас 4:

Сладостию Духа напаяем / и теплотою Христовы любве согреваем / с плачем искал еси Христа в житии твоем / и Того Смиренна и Кротка слезами изобразил еси в нас / умильно зовущих ти. / Печалию твоею наполнихомся веселия нетленнаго, / Силуане, утешителю наш и молитвенниче вселенныя.

Ин тропарь, глас 3:

Дух Святый научи тя любити Бога и человека / лицезревий Христа, исполнился еси неописаннаго смирения / и был еси источник слез о вселенней / проповедая всем: "Любите враги вашя". / Не забуди убо ихже возлюбил еси / Силуане, Преподобне Отче наш, / посещая чад твоих / и моляся присно Господеви / даровати нам святое Его смирение.

Служба преподобному Силуану Афонскому
[/ Составил иеромонах Серафим (Барадель)].
Житие старца. -СПб.: Вера; Юр.В.Ан., 1997. -С. 7, 8.

+ + +

Тропарь, глас 4:

В вертограде духовнем Святыя Горы Афонския, / в уделе Пречистыя Девы Богородицы, / в трудах, бдениях и молитвах / стяжал еси благодать Всесвятаго Духа, / и унаследовал еси обитель Царя Небеснаго, / Его же моли Силуане преподобне, / спастися душам нашим.

Кондак, глас 8:

Акафист преподобному Силуану, старцу Афонскому
[/ Составлен насельниками Московского подворья
Свято-Пантелеимонова монастыря]. -М.:
Московское подворье Свято-Пантелеимонова
монастыря, 1998. -С. 32.