Благословившу священнику, начинаем:
Псалом 142: ГОСПОДИ, УСЛЫШИ МОЛИТВУ МОЮ...
Слава и ныне: Аллилуиа
Бог Господь и явися нам: со стихи: Таже:
Тропарь Преподобному, глас 4:
Сладостию Духа напаяем / и теплотою Христовы любве согреваем / с плачем искал еси Христа в житии твоем / и Того Смиренна и Кротка слезами изобразил еси в нас / умильно зовущих ти. / Печалию твоею наполнихомся веселия нетленнаго, / Силуане, утешителю наш и молитвенниче вселенныя.
Слава,
Ин тропарь, глас 3:
Дух Святый научи тя любити Бога и человека / лицезревий Христа, исполнился еси неописаннаго смирения / и был еси источник слез о вселенней / проповедая всем: "Любите враги вашя". / Не забуди убо ихже возлюбил еси / Силуане, Преподобне Отче наш, / посещая чад твоих / и моляся присно Господеви / даровати нам святое Его смирение.
И ныне,
Богородичен, глас 4:
Всех скорбящих Радосте / светлый Покров вселенныя Ты еси, Владычице, / в крове крылу Твоею покрой и Обитель сию / в славу милостиваго Сына Твоего возложенную / к Тебе бо день и нощь взываем / в скорбех и болезнех, смиреннии раби Твои, / буди пристанище спасения нам / и вся настави к тихому свету Христовых заповедей / со Предтечею и Силуаном преподобным / в мире и любви управляющи живот наш. / Ты бо еси иноком отрада / и сладчайшая утеха душ наших, / Дево пренепорочная.
Таже Псалом 50: Помилуй мя, Боже.
И канон, егоже краегранесие:
СКОРБЯЩИХ НАС УТЕШИ СИЛУАНОМ, МИЛОСТИВЕ
ПЕСНЬ 1 - Глас 8:
Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим.
Преподобне Отче Силуане, моли Бога о нас.
Скорбьми и болезньми обремененныи к тебе прибегаем, Силуане Отче наш, утешения ищуще: о носителю дивный Духа Святаго, одожди сердца наша росою умиления.
Преподобне Отче Силуане, моли Бога о нас.
Книгу твою, одушевленную дыханием Духа, яко залог нетленныя отеческия любве оставил еси нам, юже чтуще мним слышати твой тихий глас, вызывающий нас от бездны греха к исправлению жития.
Слава: Охладе любы многих за умножение беззакония, и мраз нощи безлунныя объят нас, но вжег светильник молитвы твоея, Отче, разреши мглу страстей и согрей сердца наша сладчайшим светом милости Божия.
И ныне: Радость всех скорбящих, алчущим питательница, бездомных светлая обитель, обуреваемым тишина Ты еси, Владычице, со преподобным Силуаном не перестай молящися да познают вси людие Сына Твоего Духом Святым.
ПЕСНЬ 3
Ирмос: Небеснаго круга верхотворче Господи, и церкве зиждителю, Ты мене утверди в любви Твоей, желаний краю, верных утверждение, едине Человеколюбче.
Буди нам отец и покровитель, Силуане благосердне, отри слезы беззащитных сирот, прохлади души, изнемогающия тяготами житейскими, и всем даждь разумети, что есть отрада Господня.
Яко глубочайший сосуд, исполнь даров Пресвятаго Духа, изливай нам тишину божественную, яко буря злых обдержит ны и вопием ти от сердца: умири жизнь нашу миром Христовым, преподобне.
Слава: Щадити всех и вся учил еси, верный органе Святаго Духа, и ныне невидимою рукой прикоснися очесем нашим да узрим славу Божию в братии нашей и потечет, яко поток огненный, молитва, милующая всякую тварь.
И ныне: Именем Твоим, Владычице, горы искапают сладость, холми яко агнцы взыграются, и земнороднии вси радости неизглаголанныя исполняемся, поюще Тя, ширшую небес и чистшую светлостей солнечных, осеняющую мир милосердием Твоим.
Спаси от бед рабы Твоя, Богородице, яко вс по Бозе к Тебе прибегаем, яко нерушимей стене и предстательству.
Моли Бога о нас, Преподобне Отче Силуане, яко мы усердно к тебе прибегаем, скорому помощнику и молитвеннику о душах наших.
Ектения сугубая: Помилуй нас, Боже:
Тропарь, глас 2:
Плачущим сокровенное радование, боримым защитниче и сирым помощниче, нищих и убогих покровителю, заступник за простыя и смиренныя люди и всему миру печальник ты еси, потщися избавити ны от бед и напастей, Силуане Отче наш, яко обнищахом зело во гресех.
ПЕСНЬ 4
Ирмос: Услышах, Господи, смотрения Твоего таинство, разумех дела Твоя, и прославих Твое божество.
Хлебом жизни укрепи руце ослабленныя и колени разслабленныя, Силуане, яко уны дух наш от страха и чаяния грядущих на вселенную; да утешатся малодушнии зрением Господа всепрощающа и не убоятся ктому, имуще Христа крепкаго поборника.
Ныне зряй непостижимо красоту Лица Господня и наслаждаяйся райския доброты, не гнушайся безобразия нашего, Отче, но дай помысл умиления, да покаянием обрящем паки Образ Христова благолепия.
Слава: Аще и время твоих скорбей прейде, Силуане дивне, обаче утробою Христовою не перестаеши сострадати нам, бедствующим на земли, и во свете невечернем приносиши о нас слезы неизреченныя любве, ихже ради вси сладости утешения исполняемся.
И ныне: Сыны Твоя нарече нас распятый Господь, Чистая, темже от греховныя тьмы избавивльшихся яви нас воистину чада Божия, да со дерзновением воззовем: "Отче наш Небесный, слава Тебе, благоволившему породнити нас Страстьми Христовыми".
ПЕСНЬ 5
Ирмос: Просвети нас повелении Твоими, Господи, и мышцею Твоею высокою, Твой мир подаждь нам, Человеколюбче.
Уязвленныя страстьми многими не презри нас, Отче, яко близ есмы отчаяния, но милосердне обвяжи раны нашя, и слезами пречистыми покажи ны паки паче снега чистейшия.
Тек яко орел на высоту смирения, вещим взором приникаеши в глубины богословия, и нам, слепым, даруй прозрение Духом Святым, Отче, да исполнимся божественных догматов и православно прославим Троицу Единосущную во веки.
Слава: Егда удари Моисей жезлом камень, потекоша воды в пустыни, и ныне ты, Отче, острием словес твоих уязви ожесточенная сердца наша, да напоимся струями живоносными, и возсияет нам из купели слезныя чудный Свет Воли Божия.
И ныне: Шипок тайныя рая Богоматерняго, на Горе Святей прозябший, ныне благоухаеши вселенную всю ученьми твоими, Мудре, и нам погибающим от яда тлетворнаго буди воня Христова в живот вечный.
ПЕСНЬ 6
Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися: и молюся яко Иона: от тли, Боже, избави мя.
Источник жизни помози найти заблудшим в пустыни мира, и нас притекающих к тихим струям словес твоих, Силуане богомудре, напой реками воды живыя, истекшими от чрева твоего.
Слез наших не премолчи, Силуане блаженный, якоже сам в житии твоем в плаче истаяваем, познал еси томление души отпадшия от Бога, темже явися ныне помощник державный всем сокрушенным скорбьми житейскими.
Слава: Имуще тя питателя жизни нашея, Силуане милостивый, вопием: дай нам пищу благодати, яко глад Божий постиже нас, Отче, дай нам, жаждущим, живую воду богоразумия Духом Святым, и в теплую ризу облеци ны любве божественныя.
И ныне: Людие да веселятся, осеняемии тайным пришествием Богоматере, покрывающия вся скорби земли, к Нейже души наша влекутся непрестанно любовию, ублажающе Ю гласы твоими, Силуане, яко радость и упование наше.
Ектения сугубая, священник поминает о здравии
И по возгласе,
Кондак, глас 6:
Слезами благосердными сеяный скорби постныя, преподобне Отче, ныне же собираеши многоперстныя класы радостию, яко плод чрева, приводя Христу чада твоя от всех конец земли. О дивне Силуане, тобою да очистимся на гумне покаяния, и ветром любоблагоутробия Своего развеет Господь плеву дел наших, и яко пшеницу чистую затворит ны в небесную житницу, и в недрех твоих упокоимся во веки.
И абие:
Прокимен, глас 4:
Честна пред Господем смерть преподобных Его.
Стих: Терпя потерпех Господа и внят ми и услыша молитву мою.
Священник: И о сподобитися нам слышанию Святаго Евангелия, Господа Бога молим.
Премудрость, прости, услышим Святаго Евангелия. Мир всем.
От Матфея святаго Евангелия чтение:
Рече Господь Своим учеником: Вся Мне предана суть Отцем Моим, и никтоже знает Сына токмо Отец, ни Отца кто знает токмо Сын, и емуже аще волит открыти. Приидите ко Мне вси труждающиеся и обременненнии, и Аз успокою вы. Возьмите иго Мое, и научитеся от Мене, яко кроток есмь и смирен сердцем, и обрящете покой душам вашим. Ибо бо Мое благо и бремя Мое легко есть.
И абие, Слава: Глас 6:
Молитвами Преподобнаго Твоего, Милостиве, очисти множества согрешений наших.
И ныне: Молитвами Богородицы, Милостиве, очисти множество согрешений наших.
Таже:
Помилуй мя, Боже, по велицей милости Твоей, и по множеству щедрот Твоих, очисти беззаконие мое.
Глас 6:
Царствие Отчее оставив и богатство нетленных даров безумно расточив, ныне гладом одержим есмь и точию стенания и слезы в достояние мне, темже обращься, молю тя, Силуане преподобне, яко сам шел еси стезею блуднаго, помози и мне обрести путь и дом Отца Небеснаго, дай же узрети ми Господа милосердствующа тепле, текуща же и кротко отверзающа ми объятия отеческая, да наслаждуся паки пищи безсмертия и с тобою прославлю желаннаго Спаса, неизреченную и непостижимую имеюща милость.
Священник: Спаси, Боже, люди Твоя, и благослови достояние Твое:
Господи, помилуй , 12 раз
Милостию и щедротами: и прочая.
ПЕСНЬ 7
Ирмос: От Иудеи дошедши отроци, в Вавилоне иногда, верою троическою пламень пещный попраша, поюще: Отцев Боже, благословен еси.
Угасе в нас огнь благодати и небо затворися нам, но даждь нам помощь от скорби, Силуане Отче наш, и просвети нас пети во смирении и любви даже до последняго издыхания: Отцев Боже, благословен еси.
Адовы ужасы, яко скимни, обыдоша нас, но моления твоя стяжахом яко покров божественный, имже покрываеши нагия дерзновения, Отче милостиве, и сердца согреваеши печалию греховною унывающия.
Слава: Неописаннаго смирения Христа Бога вкусивый, во вся дни живота твоего смирялся еси жестоко, Отче, и нас научи стяжати кроткаго и смиреннаго Духа, да не погубим благодати ктому и не возрыдаем о ней адамовым рыданием.
И ныне: О всепетая Мати, рождшая всех святейшее Слово, вдохнови нам слово пламенное да сынолепне воспоем милость Твою, еюже матерски болезнуеши о скорбящем мире, якоже возвести нам Силуан, таинник Твой.
ПЕСНЬ 8
Ирмос: Царя Небеснаго, Егоже поют вои ангельстии, хвалите и превозносите во вся веки.
Милующее вемы сердце твое, Силуане, яко на земли тайно научаем Духом Святым выну скорбел еси о грешницех, в молитвах проливая слезы о них, темже утробу твою сострадательную ныне отверзи и нам, сирым твоим.
Молитвою слезною укрепи нас утреневати от нощи греховныя, Силуанее Отче наш, и во свете нетленныя любве, веселыми ногами пойдем с тобою за утренней Звездою, Христом, славяще Его во вся веки
Идеже любы, тамо и печаль, яко и любы присно состраждет, темже, Отче милостиве, пой нам, скорбящим на земли, песнь, ейже научи тя Дух Святый, и расширится сердце наше тещи путь крестный даже до конца.
Слава: Лики ангельскими неизреченно воспеваемую, ныне зриши во славе Матерь и Деву, Юже умоли, любоблагоутробне, ниспослати нам богородичную благодать, еже матерним сердцем болезновати о всех, яко о присных детех.
И ныне: От змия греховнаго Симеона юнаго спасла еси, Мати, на стези покаяния наставивши, и души нашя, иссохшия от горести уныния наслади посещением Твоим и исправи, яко жезл, непорочно сохранити пути жестоки, любве ради Сына Твоего.
ПЕСНЬ 9
Ирмос: Воистину Богородицу Тя исповедуем, спасеннии Тобою, Дево чистая, с бесплотными лики Тя величающе.
Се вся земля скорбит и взывает ти гласом нашим, Отче всемирне: Научи нас смирити себе и любити враги да вселится в ны Дух Святый и обрящем небесное Царство с тобою.
Труждаяйся паче человека, пророчески приял еси во чреве, страха ради Господа, и поболел и родил еси нам духа спасения Божия, имже веселиши многия, Отче, и росою слез твоих исцелиши вся поющия ти: Радуйся, Силуане, утешителю наш.
Изнеможе всякое слово, и токмо воздыхания сердечная оставишася нам, но глаголы твоя украдше, приносим ти последний сей глас: Силуане, Отче наш, моли о нас, детех твоих ныне и в час судный, да будем с тобою на небесех, слышаще песни, яже поются Духом Святым.
Слава: Видел еси Свет истинный, приял еси Духа небеснаго, таинниче благодати, да свободимся и мы тобою всякия прелесте, Силуане, и научимся поклонятися живоначальней Троице духом и истиною.
И ныне: Елей светильника нашего оскуде, и мрак смертный найде на нас, но возсиявши, пречистая Заре, введи ны в чертог Христов да причастницы будем тайныя Вечери Агнца со Отцами нашими и с Тобою, девственная Радосте небесных и земных.
И абие: ДОСТОЙНО ЕСТЬ ЯКО ВОИСТИНУ:
И кадит священник жертвенник и люди, и мы поем настоящая величания, глас 6:
Обитель твою не остави, Силуане, посещаяй нас в тайне на всяк день и моления исполни молящихся в храме твоем, яко тя вемы промыслителя о жизни нашей.
В мире глубоцем сохрани место сие, и любовь неразрушимую изливай нам всегда да согласно славим прославльшаго тя Духа.
Листвием прохладным покрый нас от зноя страстей и плодами насыти Духа Святого, яко тя, обретохом древо жизни, Силуане, всем приступное, и блажим твой отеческий покров.
Дивный цвет земли русския, пустыни Афонския тайное прозябение, вселенней же всей украшение, Силуана великаго песньми почтим.
На тя, по Бозе и Богородице, надежду нашу возложихом, Силуане милостиве, буди неусыпный пастырь стаду твоему ныне и в час испытания, да узрим тогда твой зрак преподобный и всесветлый.
Ковчег мощей твоих испущает благовонное дыхание Духа, егоже лобызающе верою, веселия исполняемся несказаннаго и исцеление приемлем души же и тела.
В последняя скорбящим даровася утешитель, седящим во тьме воссиял светило, недужнии же обретоша целителя, и мы, унаследовавше тя близкаго и приснаго Отца, благодарно славим Христа во веки.
Идеже обрящентся отец, тамо и сын спребывает, Отче Сиулане, славы, еяже причащаешися ныне сподоби сына твоего Софрония, иже тя достойно почти.
Свят сый, Силуане, отцелюбива восприими ученика твоего, изрядна жизнеписателя и язык твой явльшася, Софрония, таинника и приемника твоего.
Обитель на земли яко живый памятник воздвигша тебе, Силуане, введи ныне Софрония, верна послушника твоего в селение твое на небесех, и обитель сию утвердите о любви вашей до скончания века.
Таже: Трисвятое: Пресвятая Троице: По Отче наш:
Тропари, глас 6:
Помилуй нас, Господи, помилуй нас:
Слава: Господи, помилуй нас:
И ныне: Милосердия двери:
Священник: Помилуй нас, Боже, по велицей милости Твоей:
Лик: Господи помилуй, трижды.
Прочая поряду, посем Отпуст, по немже поем сия сладкогласно:
ГЛАС 2
Возведи ны на гору высокую, боговидче Силуане, и покажи нам, как обещал, кроткое и милостивое Лице Христа, якоже обещался еси, отверзи слух наш молитвенным прикосновением, и услышим сладкий глас Господень, дарующий всем оставление, да изыдет молитва всея земли, как прекрасный тихий облак, освещенный солнцем, и возрадуются небеса, поюще песнь величания Господу за страдания Его, имиже спасе нас.
Все упование наше на Тя возлагаем, Мати Божия, сохрани нас под кровом Твоим.
ГЛАС 8
Духа Святого обнови во утробе нашей, молитвами твоими, Отче, и ниспошли свыше на вся сыны земли дух истиннаго благочестия, да, якоже море наполняют воды, тако вселенная исполнится нетленным Светом богоразумия, и вси языцы единеми усты и единем сердцем славят Творца, Отца и Сына и Святаго Духа во веки.
Владычице, приими молитвы раб Твоих и избави нас от всякия нужды и печали.
И конец: Молитвами Святых Отец наших:
Май 1995.
